Operación conxunta da Policía Nacional e a Garda Civil

Desarticulada unha organización criminal cando se atopaba “alijando” máis dunha tonelada de cocaína

Foron detidas sete persoas mentres estaban “alijando” a droga nunha embarcación de alta velocidade en Vilanova de Arousa

Durante a operación interveuse a embarcación de 12 metros de eslora e 1350 cv de potencia, unha pistola, dous vehículos e equipos de comunicación

16/01/25

Axentes da Policía Nacional, nunha operación conxunta coa Garda Civil, desarticularon unha organización criminal cando se atopaban “alijando” 1.100 quilos de cocaína no municipio pontevedrés de Vilanova de Arousa. Foron detidas sete persoas e interveuse a embarcación de 12 metros de eslora e 1350 cv de potencia, unha pistola, dous vehículos e equipos de comunicación.

A investigación iniciouse en novembro de 2024 cando os axentes detectaron a posible actividade ilícita que estaba a levar a cabo unha organización criminal, instalada no Salnés, dedicada ao tráfico de drogas.

O desenvolvemento da investigación, dirixido desde o Xulgado de Instrución Tres de Vilagarcía de Arousa e a Fiscalía especial Antidroga de Pontevedra, permitiu aos axentes non só coñecer as intencións criminais dos compoñentes da organización, senón tamén identificar o medio de transporte que pretendían utilizar para facer chegar ao noso país unha importante partida de cocaína.

Ao longo dos últimos meses do 2024, as indagacións centráronse no control tanto do medio de transporte, como das persoas que ían formar parte da tripulación. Ademais, tamén se realizaron investigacións  sobre as persoas que, situados nun chanzo superior da pirámide na que está conformada a organización investigada, dirixían a estratexia cos provedores para cargar o estupefaciente.

Unha embarcación de 1350 cabalos de potencia

As investigacións detectaron que a finais do mes de decembro unha embarcación de alta velocidade, dotada de tres motores de 450 cv de potencia cada un, fíxose ao Atlántico con catro persoas abordo, con destino a un punto xeográfico establecido para obter a ilícita carga.

Finalmente, durante a madrugada de hoxe, unha vez localizada a embarcación, un equipo do GEO da Policía Nacional levou a cabo a súa abordaxe no momento xusto no que se atopaba alijando en Rego do Alcalde en Vilanova de Arousa (Pontevedra). Ao mesmo tempo, as unidades investigadoras de ambos os corpos, nun dispositivo terrestre, aseguraron a zona para a detención de todas as persoas que se atopaban preparadas para cargar e transportar o estupefaciente nos vehículos que tiñan preparados.

No operativo foron detidas sete persoas e incautouse máis dunha tonelada de cocaína, unha pistola do calibre 9 mm parabellum, dous vehículos, equipos de comunicación cos que se coordinaba o alijado e a embarcación de alta velocidade.

A investigación, que continúa aberta sen descartarse novas detencións, contou coa colaboración da DEA norteamericana, a Policía Judiciaria de Portugal e a Aduana de Francia.

Últimas novidades