Europoleko Ziberkrimenaren Europako Zentroak, Estatu Batuetako Ziberkrimenaren Zentro Nazionalak eta Interpolek koordinatutako operazioa

Milioi bat sistema kutsatu baino gehiago dituen munduko zonbi-sare aktiboenetako baten azpiegitura desegin dute

Sistemak kutsatzen zituen software maltzurra zibergaizkileek tresna gisa erabiltzen zuten legez kanpoko hainbat jarduera egiteko

Operazioa aurrera eramateko, komando- eta kontrol-zerbitzarien kontrola hartu da, baita botnetaren azpiegitura osatzen zuten domeinuena ere

09/12/15

Polizia Nazionaleko agenteek operazio batean parte hartu dute, eta, horri esker, "dorkbot" -en azpiegitura desegin dute, 200 herrialde baino gehiagotan milioi bat sistema kutsatu baino gehiago dituen munduko ordenagailu zonbi sare aktiboenetakoa. Sistemak kutsatzen zituen software maltzurra zibergaizkileek tresna gisa erabiltzen zuten legez kanpoko hainbat jarduera aurrera eramateko. Europoleko Ziberkrimenaren Europako Zentroak (EC3), Estatu Batuetako Ziberkrimenaren Zentro Nazionalak eta Interpolek koordinatu dute ekintza, eta Belgikako, Alemaniako, Frantziako, Lituaniako, Herbehereetako eta Montenegroko poliziek hartu dute parte.#;

Botneten azpiegiturako zerbitzarien eta domeinuen kontrola:

2011n aurkitu zutenetik, desegindako zonbi sareak milioi bat ekipo baino gehiago kutsatu ditu 200 herrialde baino gehiagotan, eta erabiltzaileak ez dira ezagutzen. Espainian, 2.000 ordenagailutik gora daude kutsatuta. Kutsatzeko mekanismoa biktimek USB flash memorien, berehalako mezularitza programen edo sare sozialen bidez jasotzen duten fitxategi bat akats baten ondorioz exekutatzen dutenean gertatzen da. Une horretatik aurrera, jarduera maltzurrak egiteko urrutitik kontrolatutako bot-en edo ordenagailu zonbien mundu mailako sare baten parte bihurtzen da sistema. Operazioa burutzeko komando eta kontrol zerbitzarien eta botnetaren azpiegitura osatzen zuten domeinuen kontrola hartu da. Polizia-ekintza horren konplexutasuna zonbi-sarearen azpiegitura zibernetikoa osatzen zuten elementuak zehaztean eta aztertzean datza; horiek ezarri ondoren, herrialdeen artean ezin hobeto koordinatutako polizia-operatibo bat garatu behar izan dute, sare maltzurra osatzen duten elementu informatiko guztien jarduera aldi berean eteteko eta horien kontrola eskuratzeko.

Delitu egiteko ordenagailu kontrolatuak:

"Dorkbot" botnet-aren kasuan, sistemak kutsatzen zituen software maltzurra legez kanpoko jarduera ugaritarako tresna gisa erabiltzen zen, besteak beste, online ordainketetatik eratorritako banku-kredentzialak lapurtzea, interneteko beste zerbitzu batzuetako kredentzialak lapurtzea, banatutako zerbitzua ukatzeko erasoak egitea, eta kutsatutako makinetan beste software maltzur mota batzuk deskargatzea.

Zonbi-sare bateko kide ez izateko aholkuak:

Ordenagailuaren abiadura galtzea, haizagailuak zarata handiegia egitea erabiltzen ari denean, funtzionatzen ez duten edo behar ez bezala funtzionatzen duten aplikazioak, PCa urrunetik kontrolatzeko gai den birusak kutsatu izanaren ondorio izan litezke. Kutsatzeak ekiditeko, Polizia Nazionalak sistema eragilea eta instalatutako programak eguneratuta mantentzea gomendatzen du -horretarako, eguneratze automatikoak aktibo izatea gomendatzen da-. Era berean, antibirusa eta suebakia edukitzea komeni da, birusak edo bestelako elementu maltzurrak detektatzeko, blokeatzeko eta ezabatzeko.

ESIren Antibotnet zerbitzua:

Industria, Energia eta Turismo Ministerioaren mendeko INCIBEren (Zibersegurtasunaren Institutu Nazionala) Internautaren Segurtasun Bulegoak mekanismo bat du Interneteko erabiltzaile espainiarren eskura, Interneteko konexioari loturiko ordenagailu zonbien edo botneten sareekin loturiko zibersegurtasun-mehatxu edo -gorabeherarik ba ote dagoen jakiteko. Horretarako, ordenagailu bakoitzari dagokion IP helbide publikoa azter daiteke ESIko datu-basearekin. Zerbitzu horren helburua da informazioa eta tresnak ematea herritarrei, kutsatuta egonez gero, gailuak desinfektatu ahal izateko. Polizia Judizialaren komisaria orokorreko Ikerketa Teknologikoko Unitateko (UIT) Segurtasun Informatikoko Brigada Zentraleko Segurtasun Logikoko Taldeak garatu du ikerketa hori, nazioarteko beste polizia-kidego batzuekin eta enpresa pribatuen laguntzarekin.

Azken prentsa-oharrak