Algecirasen

Espainia eta Maroko artean ziharduen “narkodroi” sare bat desegin du Polizia Nazionalak

Aireontziak Ukrainan egiten ziren eta errepidez Espainiaraino eramaten ziren Campo de Gibraltarren eta Costa del Solen kokatutako erakunde kriminalek erabil zitzaten

Narkotrodronek 10 kilo haxix garraiatzeko gaitasuna zuten hegaldi bakoitzean eta 50 kilometro baino gehiagoko autonomia zuten

Hamar pertsona atxilotu dituzte eta sei miaketa egin dituzte Algeciras eta Marbellako etxeetan

28/11/24

Polizia Nazionaleko agenteek Algecirasen talde kriminal bat desegin dute; antza denez, Marokotik haxixa sartzen zuten, tripulaziorik gabeko aireontziak erabilita. “Narkodronak” Ukrainan egiten ziren eta, ondoren, errepidez gure herrialdearen hegoalderaino eramaten ziren. Han, substantzia estupefazientearen bidalketak eskaintzen eta adosten ziren Campo de Gibraltar eta Costa del Sol inguruko tokiko erakunde kriminalekin. Guztira hamar pertsona atxilotu dituzte –horietako zazpi kartzelan sartu dituzte–, eta sei miaketa egin dituzte Algecirasen eta Marbellan, EUROPOLen eta Ukrainako eta Poloniako polizia-agintarien laguntzarekin egin duten ikerketan.

Ikerketa duela urtebete baino gehiago hasi zen, Campo de Gibraltarren eta Costa del Solen kokatutako erakunde kriminal baten existentziaren berri izan ondoren, ustez Espainian haxix kantitate handiak airez sartzen jardun zuena. Horretarako, tamaina handiko artisau-ekoizpeneko droneak erabiltzen zituzten, hegaldi bakoitzean hamar kilogramo haxix garraiatzeko ahalmena zutenak, eta berrogeita hamar kilometro baino gehiagoko autonomia zutenak. Aireontzien erabilerari esker, Maroko eta Espainia arteko ibilbidea egin zezaketen Itsasarteko uretatik hegan, eta droga gure herrialdera bota ondoren itzuli, lurreratu beharrik gabe.

Ukrainatik etorritako droneak

Normalean, droneak Ukrainan egiten ziren, eta errepidez Espainiako hegoaldera eramaten ziren. Han, Europako ekialdeko herrialdeetako pertsonek operatzen zituzten. Pertsona horiek akordioak lortzen zituzten Campo de Gibraltar eta Costa del Sol inguruan kokatutako tokiko erakunde kriminalekin, estupefazienteen aireko garraio zerbitzu hori haien eskura jartzeko. Zehazki, ikerketan zehar egiaztatu ahal izan denez, erakunde bat mila kilo haxix bidaltzen saiatu da metodo hori erabiliz.

Dagokion dispositibo operatiboa ezarri ostean, agenteek sei etxebizitza miatu zituzten Algecirasen eta Marbellan, eta bederatzi pertsona atxilotzea lortu zuten, droga-trafiko eta antolakuntza kriminaleko delituen ustezko egile gisa.

Ikerketan, hiru aireontzi atzeman dituzte, horietako bat eraikitze-fasean, bai eta urrutiko kontrolerako gailuak, horiek konpontzeko tresnak eta Espainian metodo horren bidez sartutako eskudiru eta estupefaziente kopuru handiak ere. Atxilotuak Algecirasko 5. instrukzio epaitegiaren esku utzi dituzte, eta horietako zazpi espetxeratzeko agindua eman zuen epaitegiak.

Azken prentsa-oharrak